विराटनगर। प्रतिनिधिसभाका सभामुख देवराज घिमिरेले संसदबाट ६० दिनभित्र विधेयक पारित गर्नुपर्छ भन्ने प्रधानमन्त्रीको भनाइ मुख्य विषय नभएको बताएका छन्। विराटनगरस्थित होटल बिगमा पत्रकारहरूसँग कुरा गर्दै उनले विधेयक पारित गर्ने कुरा प्रक्रियागत नभएर संसद्ले छिटो काम गर्नुपर्ने विषय भएको बताए।
'मुख्य कुरा भनेको दायित्व पूरा गर्नु हो। यसलाई कानुन वा नियमावलीमार्फत व्यवस्थित गर्न सकिन्छ, जुन प्रधानमन्त्रीले भनेका थिए। तर संसद्ले विधेयकलाई समयमा टुंग्याउनु महत्त्वपूर्ण छ,' सभामुख घिमिरेले भने।
उनले संसद्मा अहिले पनि १४ वटा विधेयक छलफलमा रहेको उल्लेख गर्दै संघीयता कार्यान्वयनका लागि निजामती ऐन र विद्यालय शिक्षा विधेयक जस्ता कानुन पारित गर्नुपर्ने बताए।
'५ दिन संसद् स्थगित गर्नुको कारण समितिलाई काम गर्ने अवसर दिनु हो,' उनले भने। साथै, उनले संसद्ले संघीयता कार्यान्वयनका लागि आवश्यक सबै कानुन निर्माण गर्न प्रयासरत रहेको बताए।
संसद्मा विचाराधीन विधेयकलाई सरकारले अध्यादेशमार्फत अघि बढाए संसद्ले अस्वीकार गर्न सक्ने अधिकार रहेको उनले स्पष्ट पारे।
पूर्वराष्ट्रपति विद्यादेवी भण्डारीको सक्रियताबारे प्रतिक्रिया दिँदै सभामुख घिमिरेले, 'पूर्वराष्ट्रपतिले हिँड्न, भेटघाट गर्न नपाउने भन्ने हुँदैन। मैले पनि उहाँलाई भेटेर सन्चो-बिसन्चो, विकास र सल्लाह सुझावका विषयमा कुराकानी गरें,' भने।
Comments
Post a Comment